នេះប្រហែលជាលើកទីមួយហើយ ដែលអ្នកលឺបែបនេះ ប៉ុន្ដែវាជាការពិតដែលរកឃើញដោយក្រុមអ្នកជំនាញមួយក្រុម។ សារធាតុ choline ដែលស្ថិតក្នុងគ្រួសារវីតាមីនB អាចជួយការពារខួរក្បាលរបស់អ្នកមិនឲ្យរងផលប៉ះពាល់ទៅតាមអាយុកាន់តែចាស់នោះ ត្រូវបានគេរកឃើញនៅក្នុងអាហារមួយចំនួនដូចជា សាច់មាន ស៊ុត (ស៊ុតគ្រប់ប្រភេទ) ទឹកត្រី និងប្រភេទបន្លែមានកួរ (សណ្ដែកកួរ)។
ក្រុមអ្នកស្រាវជ្រាវដែលមកពីសាកលវិទ្យាល័យ Boston នេះ បានរកឃើញថា មនុស្សដែលញ៉ាំអាហារដែលមានជាតិ Choline អាចមានការចងចាំល្អប្រសើរជាងអ្នកដែលគ្មានជាតិនេះក្នុងអាហារ។
អ្នកស្រីវេជ្ជបណ្ឌិត Rhoda Au ដែលជាអ្នកស្រាវជ្រាវជាន់ខ្ពស់ម្នាក់ បានបញ្ជាក់ថា ការរកឃើញនេះ គឺជាការបន្ថែមនូវភស្ដុតាងថ្មីមួយទៀត ទៅលើអំណះអំណាងដែលថា អាហារពិតជារួមចំណែកដល់ភាពខុសគ្នានៃខួរក្បាលមនុស្សម្នាក់ៗ។
យ៉ាងណាមិញ អ្នកស្រីក៏បានបន្ថែមទៀតដែរថា ការញ៉ាំអាហារដែលមានជីវជាតិ មានតុល្យភាពនៅក្នុង គឺពិតជាសំខាន់ខ្លាំងណាស់ ពិសេសសម្រាប់មនុស្សស្ថិតនៅក្នុងវ័យកណ្ដាល។
គួរបញ្ជាក់ផងដែរថា ការសិក្សាមុននេះមួយ បានរកឃើញថា ការញ៉ាំអាហារដែល មានត្រី បន្លែ និងប្រេងអូលីវ គឺអាចការពារផលប៉ះពាល់ចំពោះខួរក្បាលបាន។ បន្ដែការសិក្សាថ្មីនេះ ប្រហែលជាមានភាពជាក់លាក់ជាង ព្រោះត្រូវបានធ្វើឡើងក្នុងរយៈពេលយូរ ពោលគឺចាប់ពីឆ្នាំ ១៩៩១មក។
អ្នកដែលចូលរួមក្នុងការស្រាវជ្រាវមានចំនួន ជិត១៤០០នាក់ ដែលក្នុងនោះពួកគេត្រូវឆ្លងកាត់ការធ្វើតេសន៍ការចងចាំ និងសមត្ថភាពនៃខួរក្បាល បួករួមទាំងការស្គែនខួរក្បាល ក្រោយពីពួកគេបានឆ្លើយសំណួរផ្សងៗទាក់ទងនឹងរបបអាហារប្រចាំថ្ងៃ ។
លទ្ធផលនៃការស្រាវជ្រាវនេះបានបង្ហាញដូចអ្វីដែលបានបញ្ជាក់ខាងលើរួចមកហើយគឺថា អ្នកដែលញ៉ាំអាហារដែលមានសារធាតុ Choline មានសមត្ថភាពនៃការចងចាំបានប្រសើរជាង អ្នកដែលញ៉ាំតិចតួច។
ទោះបីជាយ៉ាងណាក្ដី វាក៏មានកត្តារួមផ្សំមួយចំនួនផងដែរ ដូចជាការអប់រំជាដើម ហើយការសិក្សាស្រាវជ្រាវផ្សេងទៀត នឹងត្រូវធ្វើបន្ដដើម្បីរកឲ្យឃើញកាន់តែច្បាស់។
ដោយ៖ CC
ប្រភព៖ rckbook
