ក្លឹបអ្នកមានបុណ្យ Barcelona បានទទួលស្គាល់ថា Ronaldinho នឹងត្រូវត្រឡប់មកកាន់អតីតក្លឹបចាស់របស់ខ្លួនមួយនេះម្តងទៀត ដែលគាត់នឹងចាប់យកតួនាទីក្នុងនាមជាឯកអគ្គរដ្ឋទូតក្លឹប។
អតីតតារាបាល់ទាត់សញ្ជាតិប្រេស៊ីលដ៏ល្បីល្បាញរូបនេះ ត្រូវបានគេចងចាំជានិច្ចអំឡុងការបង្ហាញវត្តមានរបស់គាត់ក្នុងទឹកដី Camp Nou បន្ទាប់ពីបានចំណាយពេលចំនួនប្រាំរដូវកាលនៅឯក្លឹបយក្សមួយនេះក្នុងនាមជាកីឡាករម្នាក់។
គាត់បានបង្ហាញវត្តមានបានចំនួន ២០៧លើកសម្រាប់ក្លឹបយក្សរបស់ជនជាតិកាតាឡានមួយនេះក្នុងចន្លោះឆ្នាំ ២០០៣ និង ២០០៨ ដោយអាចស្វែងរកគ្រាប់បាល់បានចំនួន ៩៤គ្រាប់ និងធ្លាប់គ្រងតំណែងជាម្ចាស់ពានរង្វាន់ក្លឹបកំពូលទ្វីបអឺរ៉ុបនារដូវកាលឆ្នាំ ២០០៥-០៦ ខណៈដែលពួកគេក៏បានលើកពានលីកកំពូលអេស្ប៉ាញ LaLiga នាឆ្នាំនោះផងដែរ។
Ronaldinho ទីបំផុតបានផ្លាស់ទៅកាន់ក្លឹប AC Milan មុនពេលដែលគាត់បានបញ្ចប់អាជីពក្នុងទឹកដីកំណើតរបស់ខ្លួនកាលពីឆ្នាំ២០១៥ ប៉ុន្តែគាត់នឹងផ្សាភ្ជាប់សាជាថ្មីម្តងទៀតជាមួយនឹង Barca នៅក្នុងតំណែងថ្មី ដែលក្លឹបយក្សមួយនេះបានប្រកាសកាលពីថ្ងៃព្រហស្បតិ៍ម្សិលមិញនេះ៕
ប្រភព៖bizkhme