ខែ្សប្រយុទ្ធឆ្នើមរបស់ក្លឹបបិសាចក្រហម Manchester United គឺកីឡាករ Zlatan Ibrahimovic បានលើកឡើងថា អនាគតរបស់ខ្លួននៅជាមួយក្លឹបនៅអង់គ្លេសមួយនេះ នៅមិនទាន់ច្បាស់ការណ៍នៅឡើយ ស្របពេលដែលកិច្ចសន្យារបស់គាត់ នឹងអស់សុពលភាពក្រោយចប់រដូវកាលនេះ។
អតីប្រធានក្រុមជម្រើសជាតិស៊ុយអែត រូបនេះ បានរកគ្រាប់បាល់បាន ២០គ្រាប់ហើយជូន Man Utd នៅក្នុងព្រឹត្តិការណ៍ទាំងអស់ គិតត្រឹមពេលនេះ ហើយអ្នកចាត់ការទូទៅលោក Jose Mourinho កំពុងតែចាប់អារម្មណ៍ចង់រក្សាទុក Zlatan ទុកជាមួយក្លឹបចំនួនមួយឆ្នាំទៀត។
ក្នុងនោះដែរតារាឆ្នើម Zlatan Ibrahimovic បាននិយាយថា “ខ្ញុំប្តេជ្ញាថានឹង ត្រូវតែស៊ុតឲ្យបាន ១០០គ្រាប់ ដើម្បីបានលេងបាល់ដល់ឆ្នាំក្រោយទៀត។ ការគិតរបស់ខ្ញុំ គឺកំពុងតែដំណើរការហើយ ប៉ុន្តែអ្វីៗមិនទាន់សម្រេចនៅឡើយទេ។ ពួកយើងនឹងបន្តរង់ចាំមើលទៀតថា នឹងមានអ្វីកើតឡើង។”
គួរបញ្ជាក់ផងដែរថាកីឡាករចាស់វស្សា Zlatan Ibrahimovic បានចូលរួមជាមួយនឹង Manchester United កាលពីមុនពេលចាប់ផ្តើមរដូវកាល ផ្ទេរមកពី PSG ដោយគ្មានតម្លៃខ្លួន៕
ដោយ៖NSN
