រឿងខ្លះ​ដែល​សិស្សត្រូវ​គិត​បន្ត​បន្ទាប់​ជាប់​បាក់ឌុប​ហើយ

ជាការពិតណាស់ វាជាជោគជ័យមួយក្នុងជីវិតយើងដែលអាចប្រលងជាប់សញ្ញាប័ត្រមធ្យមសិក្សា
ទុតិយភូមិ(បាក់ឌុប) ប៉ុន្តែវាមិនមែនបានន័យថាការដែលមិនទាន់អាចប្រលងជាប់បាក់ឌុប ជីវិតរបស់យើងបរាជ័យណោះទេព្រោះត្រឹមសញ្ញាប័ត្រមួយសន្លឹកមិនអាចកំណត់ថាយើងត្រូវបរាជ័យ
នោះទេ។ សម្រាប់អ្នកដែលបានប្រលងជាប់ យើងក៏មិនត្រូវភ្លេចខ្លួន និងបង្អង់ពេលយូរឡើយ ហើយយកពេលមកគិតរឿងដែលសំខាន់បំផុតមួយទៀតក្នុងជីវិត គឺការជ្រើសរើសជំនាញបន្តការ
សិក្សានៅថ្នាក់ឧត្ដមសិក្សា។ ដូច្នេះហើយថ្ងៃនេះ ខ្ញុំសូមលើកយករឿងខ្លះមកនិយាយគ្រាន់ជា
ជំនួយក្នុងការគិត និងការសម្រេចចិត្តដ៏សំខាន់មួយគឺ ការបន្តជីវិតសិក្សាចូលថ្នាក់ឧត្ដមសិក្សា។ 

១/ តើគួររៀនបន្តលើមុខជំនាញអ្វី?

ការសម្រេចចិត្តលើមុខជំនាញសិក្សាបន្តនេះជារឿងសំខាន់បំផុតមួយនៅក្នុងជីវិតរបស់យើង។ ដូច្នេះហើយយើងត្រូវសម្រេចចិត្តឲ្យបានត្រឹមត្រូវ ចៀសវាងស្ដាយក្រោយនៅពេលក្រោយ។ ជាក់ស្ដែងទៅ ខ្ញុំផ្ទាល់ធ្លាប់មានបទពិសោធន៍ជ្រើសរើសជំនាញខុស។ អញ្ចឹងហើយ

ខ្ញុំសូមណែនាំឲ្យប្រុងប្រយ័ត្នបំផុតពេលជ្រើសរើសជំនាញសិក្សា ព្រោះវាជាដំណាក់

កាលមួយដែលអាចផ្លាស់ប្ដូរជីវិតយើងទាំងស្រុងទៅតាមការសម្រេចចិត្តរបស់យើង។ ចំពោះខ្ញុំ ការសម្រេចចិត្តជ្រើសរើសជំនាញសិក្សានេះ កត្តាដែលខ្ញុំគិតថាសំខាន់បំផុតនោះគឺ

ការស្គាល់ខ្លួនឯង។ ការស្គាល់ខ្លួនឯងនេះផងដែរ ខ្ញុំចង់សំដៅដល់ថាតើយើងដឹងហើយ

ឫនៅថាយើងចូលចិត្តធ្វើអ្វី ដឹងថាអ្វីជាក្ដីស្រមៃយើង ដឹងថាយើងមានទេពកោសល្យ

អ្វីពិសេសដែរជាដើម។ ចូរកុំសម្រេចចិត្តរើសជំនាញសិក្សាតាមគ្នាឲ្យសោះ តែត្រូវ ជ្រើសរើសទៅតាមចំណង់ចំណូល និងក្ដីស្រមៃរបស់យើង ទើបជាការល្អ។ កត្តាមួយទៀតគឺ ព័ត៌មានទាក់ទងនឹងជំនាញដែលយើងយល់ថាយើងស្រលាញ់។ ព្រោះថាពេលខ្លះ អ្វីដែលយើងគិតថាយើងស្រលាញ់អាចមិនជាអ្វីដែលយើងស្រលាញ់ពិតប្រាកដពេលដែលយើង

ដឹងព័ត៌មានច្រើនពីវា។ព័ត៌មានទាក់ទងនឹងមុខជំនាញដែលខ្ញុំលើកឡើងនេះក៏ចង់សំដៅផង

ដែរដល់ការដឹងថាបន្ទាប់ពីរៀនចប់យើងអាចធ្វើអ្វីបាន មុខជំនាញដែលយើងពេញ

ចិត្តនេះទាមទារអ្វីខ្លះជាដើម។ កុំជ្រើសរើសជំនាញសិក្សាដោយគ្រាន់តែលឺគេនិយាយតគ្នា តែគួរតែស្វែងរកព័ត៌មានឲ្យបានគ្រប់គ្រាន់សឹមសម្រេចចិត្ត។ ការដែលមានព័ត៌មាន

ច្រើននឹងជួយឲ្យយើងសម្រេចចិត្តបានត្រឹមត្រូវ។ 

 ២/ តើគួររៀននៅសាលាណា សកលវិទ្យាល័យណា?

ការជ្រើសរើសគ្រឹះស្ថានសិក្សាក៏ជារឿងសំខាន់ដែរ ព្រោះថាបើសិនជាយើងទៅរៀននៅសាលាដែលគុណភាពល្អ នោះវានឹងជំរុញឲ្យកម្រិតចំណេះដឹង និងចំណេះធ្វើរបស់យើងបន្ទាប់ពីបញ្ចប់ការសិក្សាថ្នាក់ឧត្ដមសិក្សារបស់យើងបានកាន់តែប្រសើរ

សម្រាប់ចេញទៅធ្វើការ ឫក៏បើកជាជំនួញ។ ដូច្នេះតើយើងគួរគិតលើកត្តាអ្វីខ្លះ និងធ្វើយ៉ាង

ដូចម្ដេចដើម្បីជ្រើសរើសសកលវិទ្យាល័យបានត្រឹមត្រូវ? ប្រាកដណាស់ថាយើងនឹងត្រូវស្វែង

រកព័ត៌មានទាក់ទងនឹងមុខវិជ្ជាដែលយើងស្រលាញ់ឲ្យបានច្រើនបំផុតតាមដែលអាចធ្វើទៅបាន ព្រោះថាការដែលមានព័ត៌មានគ្រប់គ្រាន់នឹងជួយឲ្យយើងធ្វើការសម្រេចចិត្តល្អ។ បើអញ្ចឹងតើយើងអាចរកព័ត៌មានទាំងនេះបានដោយរបៀបណាទៅ?

 ការណែនាំរបស់សិស្សច្បង ៖ សិស្សច្បងជាអ្នកដែលបានកំពង់រៀន ឫក៏ធ្លាប់រៀនហើយនៅសាលាដែលយើងចាប់អារម្មណ៍ជាប្រភពព័ត៌មានដ៏សំខាន់មួយ និងអាចឆ្លើយតបនឹងចម្ងល់ផ្សេងៗរបស់យើងបាន។ សាកសួរសិស្សច្បងដែលយើងស្គាល់ឲ្យបានច្រើន ជាពិសេសទៀតនោះសិស្សច្បងដែលកំពុងសិក្សា ឫធ្លាប់សិក្សាមុខជំនាញដែលយើងចាប់អារម្មណ៍។  

តាមអ៊ីនធឺណិត ៖ សម័យនេះជាសម័យអ៊ីនធឺណិតហើយ ដូច្នេះយើងអាចស្វែងយល់ព័ត៌មានជាច្រើនតាមរយះអ៊ីនធឺណិតបាន។ ជាទូទៅ សាលានីមួយៗតែងតែមានគេហទំព័ររបស់សាលាផ្ទាល់។ ក្នុងនោះផងដែរ យើងអាចស្វែងយល់ពីកម្មវិធីសិក្សាមុខជំនាញដែលយើងពេញចិត្ត ក៏ដូចជាព័ត៌មានផ្សេងៗទាក់ទងនឹងគ្រឹះស្ថានសិក្សាដែលយើងចាប់អារម្មណ៍ជាដើម។ពិព័រណ៍សកលវិទ្យាល័យ ឫទស្សនកិច្ចទៅកាន់សកលវិទ្យាល័យនីមួយៗដែលរៀបចំដោយសកលវិទ្យាល័យផ្ទាល់ ៖ ជារឿយៗយើងក៏ឃើញផងដែរពិព័រណ៍សកលវិទ្យាល័យ ឫពិព័រណ៍មុខវិជ្ជាសិក្សានៅថ្នាក់

ឧត្ដមសិក្សា ឫក៏ការរៀបចំទស្សនកិច្ចទៅកាន់សកលវិទ្យាល័យផ្សេងៗផងដែរ។ ការចូលរួមកម្មវិធីទាំងនេះក៏អាចជួយឲ្យយើងដឹងព័ត៌មានទាក់ទងនឹងសកលវិទ្យាល័យដែល

មានជំនាញសិក្សាដែលយើងចាប់អារម្មណ៍ដែរ។ 

ការចូលសួរព័ត៌មានពីកម្មវិធីសិក្សាក៏ដូចជាចម្ងល់ផ្សេងៗនៅសកលវិទ្យាល័យដែលយើង
ចាប់អារម្មណ៍ផ្ទាល់តែម្ដង  ៖ បើសិនជាអាចយើងអាចចូលសួរព័ត៌មានពីសកលវិទ្យាល័យដែល
យើងចាប់អារម្មណ៍ផ្ទាល់តែម្ដងជាការល្អ ព្រោះយើងនឹងអាចទទួលព័ត៌មានច្បាស់លាស់ទាក់ទង
នឹងកម្មវិធីសិក្សា ក៏ដូចជាព័ត៌មានផ្សេងៗ។ 

 ៣/ តើការសិក្សាមុខជំនាញពីរក្នុងពេលតែមួយជាការល្អដែរឫទេ?

យើងធ្លាប់បានលឺហើយថានិស្សិតខ្លះរៀនពីរ រៀនបីសាលា។ តើការរៀនច្រើនសាលា ឫពីរបីមុខវិជ្ជាក្នុងពេលតែមួយបែបនេះជាការល្អដែរឫទេ? ចម្លើយគឺមានទាំងល្អនឹងមិនល្អ។ ល្អត្រង់ថាពេលរៀនចប់យើងអាចមានសញ្ញាប័ត្រពី ដូច្នេះយើងអាចមានជម្រើស

ក្នុងការជ្រើសជំនាញធ្វើការ។ តែចំពោះខ្ញុំ ខ្ញុំគិតថាវាមិនមែនជារៀងល្អទេ។ ព្រោះថាការសិក្សាពីរបីសកលវិទ្យាល័យក្នុងពេលតែមួយនឹងធ្វើឲ្យយើងគ្មានពេលទំនេរទេ សម្រាប់ការរៀនបន្ថែមពីមុខវិជ្ជាដែលយើងកំពុងសិក្សា គ្មានពេលចេញធ្វើការងារ

ស្ម័គ្រចិត្តផ្សេងៗបានច្រើន គ្មានពេលអានសៀវភៅបន្ថែមបានច្រើនទាំងទាក់ទងនឹងមុខ

វិជ្ជាដែលយើងសិក្សា ឫក៏ចំណេះដឹងទូទៅផ្សេងៗ ព្រោះថាការដែលរៀនពីរបីសកលវិទ្យាល័យ យើងនឹងមានថ្នាក់រៀនច្រើនម៉ោងជារៀងរាល់ថ្ងៃ មានកិច្ចការស្រាវជ្រាវច្រើនដែលត្រូវធ្វើជាដើម។ អ្នកខ្លះគេនិយាយថា គេគួររៀនជំនាញមួយនៅសកលវិទ្យាល័យមួយ ហើយរៀនភាសាអង់គ្លេស

នៅសកលវិទ្យាល័យមួយទៀត ដូចនេះពេលបញ្ជាប់ការសិក្សាគេនឹងមានជំនាញមួយ ហើយថែមទាំងអាចមានជំនាញការប្រើប្រាស់ភាសាអង់គ្លេសបានល្អទៀត។ តែសួរត្រលប់មកវិញ បើគ្រាន់តែចង់ចេះភាសាអង់គ្លេស ចុះហេតុអ្វីមិនរៀនភាសាអង់គ្លេសនៅសាលាបង្រៀន

ល្អណាមួយទៅបានហើយ ចាំបាច់អីត្រូវទៅរៀនបរិញ្ញាបត្រភាសាអង់គ្លេសមួយទៀតធ្វើអី? ដូចនេះយើងនឹងមានពេលសិក្សាលើជំនាញយើងឲ្យបានស៊ីជម្រៅ ហើយនឹងចេះភាសាអង់គ្លេសល្អដូចគ្នា។ 

 ៤/ តើមានអាហារូបករណ៍លើមុខជំនាញដែលខ្ញុំពេញចិត្តដែរឫទេ?

 យាយទៅមានអាហារូបករណ៍ច្រើនណាស់ដែលត្រូវបានផ្ដល់ឲ្យនិស្សិតខ្មែរយើងទៅសិក្សានៅ

បរទេស។ យើងត្រូវដឹងថាមានប្រភេទអាហារូបករណ៍ជាច្រើនដែលគេផ្ដល់ឲ្យសិស្សនិស្សិតខ្មែរ

យើង។ អាហារូបករណ៍ចែកចេញជាអាហារូបករណ៍ពេញ និងអាហារូបករណ៍

ដោយផ្នែក(អាហារូបករណ៍ដែលភាគច្រើនចេញតែថ្លៃសិក្សាតែប៉ុណ្ណោះ)។ ខ្ញុំសុំរាប់

អាហារូបករណ៍ខ្លះគ្រាន់ជាឧទាហរណ៍។ អាហារូបករណ៍ពេញដែលគេផ្ដល់

ឲ្យជារៀងរាល់ឆ្នាំដល់និស្សិតខ្មែរមានដូចជា អាហារូបករណ៍ប្រទេសជប៉ុន អាហារូបករណ៍ប្រទេសសិង្ហបុរី អាហារូបករណ៍ប្រទេសចិន អាហារូបករណ៍ប្រទេសថៃ អាហារូបករណ៍ប្រទេសរុស្សី អាហារូបករណ៍ប្រទេសកូរ៉េ អាហារូបករណ៍ប្រទេសឥណ្ឌា អាហារូបករណ៍ប្រទេសវៀតណាម និងមានប្រទេសជាច្រើនទៀត។ ចំណែកឯ

អាហារូបករណ៍ផ្នែកភាគច្រើនត្រូវបានផ្ដល់ឲ្យដោយសកលវិទ្យាល័យផ្ទាល់ ឫក៏អាចមាន

អង្គការផ្សេងៗជាអ្នកផ្ដល់ឲ្យ។ គ្រាន់តែរាប់បន្តិចទៅមានច្រើនណាស់ទៅហើយ។

ដោយ៖ BM

ប្រភព៖  limbique