(ភ្នំពេញ)៖ ការប្រកួតបាល់ទាត់ពាន់រង្វាន់អន្ដរជាតិ BTV Cup 2016 នៅវៀតណាម
បានឈានដល់ការប្រកួតវគ្គផ្ដាច់ព្រ័ត្រនាល្ងាចថ្ងៃទី១២ ខែធ្នូនេះហើយ
ក្នុងនោះក្រុម Shonan Bellmare មកពីលីគកំពូលជប៉ុន ត្រូវជួបក្រុមម្ចាស់ផ្ទះ
Da Nang ជាថ្មីដើម្បីប្រជែងយកជើងឯក ខណៈក្រុមបឹងកេតអង្គរ
របស់កម្ពុជាក៏ត្រូវជួបជាមួយក្រុមជម្រើសសាកលវិទ្យាល័យកូរ៉េខាងត្បូង(KUFC)
ជាថ្មីដូចគ្នាដើម្បីដណ្ដើមចំណាត់ថ្នាក់លេខ៣ ។
មែនទែនទៅ ក្រុមត្រៀមប្រកួតវគ្គផ្ដាច់ព្រ័ត្រទាំងដណ្ដើមជើងឯក និងលេខ៣
គឺសុទ្ធតែធ្លាប់បានជួបគ្នាក្នុងវគ្គសន្សំពិន្ទុតាមពូលម្ដងរួចមកហើយ
ក្នុងនោះក្រុម Shonan Bellmare បានយកឈ្នះក្រុមកំពូលតារាង Da Nang ដោយលទ្ធផល
២-១ រីឯក្រុមបឹងកេតអង្គរ បានយកឈ្នះក្រុម KUFC ដោយលទ្ធផល ២-១ ដូចគ្នា ។
ដោយហេតុនេះ គេមើលឃើញថា ការជួបគ្នាជាថ្មីល្ងាចនេះ នឹងមានភាពតានតឹងខ្លាំង
ខណៈលទ្ធផលជួបគ្នាលើកមុន បញ្ចប់ប្រផិតប្រផើយនោះ ។
គួរបញ្ជាក់ថា ពាន BTV Cup 2016 នេះ
បានដំណើរការប្រកួតតាំងពីដើមខែធ្នូកន្លងទៅ ដោយក្លឹប Mecamex Binh Duong
របស់វៀតណាមធ្វើជាម្ចាស់ផ្ទះ ប៉ុន្ដែបានធ្លាក់ត្រឹមវគ្គជម្រុះទៅហើយ ។
ចំណែកប្រាក់រង្វាន់ក្រុមជើងឯកប្រចាំព្រឹត្តិការណ៍អន្ដរជាតិនេះ
នឹងទទួលបានប្រមាណ ២១៧០០ដុល្លារអាមេរិក ។
នេះបើយោងតាមការឲ្យដឹងរបស់គណៈកម្មការរៀបចំការប្រកួត ៕
ដោយ៖ CC
ប្រភព៖ Camsports
