Alade Kabiru Abdul ខ្សែបម្រើ និងខ្សែប្រយុទ្ធ Ayomakinwa Samuel នឹងបង្ហាញថ្វីជើងរបស់ខ្លួនជាលើកដំបូង ឲ្យខេមបូឌានថៃហ្គ័រនាថ្ងៃទី០២ ធ្នូ ក្នុងការប្រកួតមិត្តភាពទល់នឹងម្ចាស់មេដាយមាសកីឡាជាតិ សៀមរាបអង្គរ នាកីឡដ្ឋានខេត្តសៀមរាប ម៉ោង៣:៣០រសៀល។
ថ្លែងក្រោយពេលហ្វឹកហាត់ នាកីឡដ្ឋានខេត្តសៀមរាប ថ្ងៃទី០១ ខែធ្នូ អតីតប្រធានក្រុម Iganmu ខ្សែប្រយុទ្ធ Ayo បានបង្ហាញសុទិដ្ឋិនិយមយ៉ាងដូច្នេះសម្រាប់ការបង្ហាញខ្លួនដំបូងរបស់គេ៖ "វាហាក់មានភាពពិបាកមួយចំនួនសម្រាប់ពួកយើងទាំងពីរ។ ដោយសារយើងទើបហ្វឹកហាត់ជាមួយក្រុមបានមួយពេល ហេតុនេះខ្ញុំយល់ថា ការបង្ហាញខ្លួននៅថ្ងៃស្អែកនេះ ពុំប្រសើរពេកនោះទេ ប៉ុន្ដែខ្ញុំព្យាយាមបង្ហាញគ្រប់អ្វីដែលខ្ញុំមាន"។
បន្ទាប់ពីតាមដានសមត្ថភាពបច្ចេកទេស តាមរយៈការហ្វឹកហាត់លើកដំបូង គ្រូបង្វឹក ហុក សុជីវ័ន បានលើកឡើងពីកីឡាករនីហ្សេរីយ៉ាទាំង២បែបនេះ៖ “សម្រាប់កីឡាករ២នាក់ដែលមកពីនីហ្សេរីយ៉ាគឺសម្ថតភាពគាត់ល្អ គឺយើងអាចទទួលយកបាន ហើយយើងនឹងច្របាច់បញ្ចូលគ្នារវាងកីឡាករខ្មែរ និងបរទេសផ្សេងទៀត ដើម្បីឲ្យគាត់ស៊ីចង្វាក់គ្នា ដើម្បីឈានទៅរកភាពល្អប្រសើរ និងទទួលបានអ្វី ឬទម្រង់ដែលពួកខ្ញុំចង់បាន ទទួលស្គាល់ថាដំបូងពួកគាត់មិនទាន់យល់នូវអ្វីដែលយើងចង់បាន តែពួកបានលេងមក គឺយើងអាចទទួលយកបាន”។
cambodia Tiger FC
