(កីឡាបាលទាត់)៖ ការប្រកួតរវាងក្លិបអធិរាជស Real Madrid និង ក្រុមអ្នកមានបុណ្យ Barcelona ត្រូវបានប្រិយមិត្តបាល់ទាត់ជាច្រើនបានទទួលស្គាល់ថាការប្រកួតមួយនេះគឺជាការប្រកួតដ៏ធំជាងគេលើលោកនាពេលបច្ចប្បន្ននេះ។
ប៉ុន្តែបើយើងគ្រាន់តែនិយាយដោយមិនមានភ័ស្តុតាងភ្ជាប់មកជាមួយនោះដូចជាពិបាកក្នុងការជឿបន្តិចដូច្នេះខ្ញុំសូមបង្ហាញនូវស្ថិតិនៃការប្រកួត El Clasico ដល់អ្នកទាំងអស់គ្នា។
នៅពេលដែលក្លិបយក្សអេស្ប៉ាញទាំង២នេះនៅលើទីលានជាមួយគ្នាគឺពិភពលោកទាំងមូលពិតជាសម្លឹងមើលការប្រកួតមួយនេះមែន។ ហេតុអ្វី? ព្រោះថាបើយោងទៅតាមគេហទំព័រ ESPN បានឲ្យដឹងថាបណ្តាញបុស្តិ៍ទូរទស្សន៍នៅប្រមាណជាង៩០ប្រទេសបានចាក់ផ្សាយបន្តផ្ទាល់ការប្រកួត El Clasico នៅរដូវកាលមុន។
មានទស្សនិកជនជាង៩មឺុននាក់បានទស្សនាការប្រកួត El Clasico ផ្ទាល់នៅកីឡដ្ឋានកាលពីរដូវកាលមុន។ មានការប្រកួតដ៏គួរឲ្យជក់ចិត្តជាច្រើនប៉ុន្តែនៅតែមិនអាចបំបាក់ការប្រកួតរវាងរៀលនិងបាសេបាន៖
កុំថាឡើយការប្រកួតបាល់ទាត់សូម្បីតែការប្រកួតផ្តាច់ព្រ័ត្របាល់ឳបអាមេរិច (American Football) ក៏មិនអាចប្រៀបជាមួយនិងការប្រកួត El Clasico បានដែរពោលគឺទស្សនិកជនដែលបានទៅមើលការប្រកួត El Clasico ផ្ទាល់នោះគឺមានចំនួន ៩៩២៦៤នាក់ខណៈដែលបាល់ឳបអាមេរីចមានត្រឹមតែ៧១០៨៨នាក់ទេប៉ុណ្ណោះ (រដូវកាលមុន)។
បើយើងងាកមកមើលពានរង្វាន់ដែលក្រុមទាំង២បានឈ្នះទៀតគឺមានច្រើនណាស់ប៉ុន្តែខ្ញុំសូមលើកស្ថិតិពានសំខាន់ជាងគេគឺពាន La Liga និងពានអឺរ៉ុប។ ក្លិបអថិរាជស Real Madrid ធ្លាប់ឈ្នះពាន La Liga រហូតទៅដល់៣២ដងចំណែកពានអឺរ៉ុបវិញគឺពួកគេធ្លាប់បានឈ្នះចំនួន១១ដង។ រីឯក្លិបអ្នកមានបុណ្យ Barcelona វិញធ្លាប់ឈ្នះពានលីកអេស្ប៉ាញ La Liga ចំនួន២៤ដងហើយពានអឺរ៉ុបចំនួន៥ដងផងដែរ។
ដោយ៖ CC
ប្រភព៖ ESPN
