តើគួររៀន​​តែ១សាកលវិទ្យាល័យ ឬក៏២ល្អ???

បរិបថសង្គមរាល់ថ្ងៃ ឃើញថានិស្សិតភាគច្រើនចូលចិត្តរៀនពីរសាកលវិទ្យាល័យ រឺ និយាយអោយចំទៅ ចូលចិត្តរៀនពីរជំនាញក្នុងពេលតែមួយ។ ចុះបើទើបរៀនចប់ទី១២ តើគួរតែធ្វើតាមគេ រៀនពីរដូចគេ រឺរៀនតែមួយបានហើយ រឺក៏ធ្វើអោយសាហាវ រៀនបីជំនាញ ទៅ? ដើម្បីជាជំនួយ យើងអាចមើលទៅលើយោបល់ ពីរដាច់គ្នារបស់និស្សិតដែល ម្នាក់គាត់រៀនមួយជំនាញ និង ម្នាក់ទៀតគាត់រៀនពីរជំនាញ។

ការរៀនតែ មួយសាកលវិទ្យាល័យ

ខ្ញុំគិតថា ពេលរើសមុខវិជ្ជា រើសតែមួយបានហើយ។ គេថារៀនពីរល្អ រៀនអង់គ្លេសមួយ រៀនអីមួយទៀតជាគោល។ បែបនេះល្អចេះអង់គ្លេសឆ្អិនហើយ មានជំនាញមួយទៀត។ តែអ្នកនិយាយភាគច្រើនភ្លេចគិតថាភាសាអង់គ្លេសក៏ជាជំនាញមួយដែរ។ បើចង់ចេះអង់គ្លេសឆ្អិន ទៅរៀនសាលាឯកជនភាសាអង់គ្លេសទៅ កុំរៀនយកបរិញ្ញាបត្រ័ភាសាអង់គ្លេស ព្រោះវានឹងកំណត់ជំនាញយើងឲ្យ យើងមានគរុកោសល្យក្នុងការប្រើភាសាអង់គ្លេសដើម្បីបង្រៀន ឬ ដើម្បីបកប្រែ ឬ សម្រាប់ទំនាក់ទំនង។ ពេលដែលយើងរៀនពីរសាលា ឬ មុខជំនាញ សំពាធការងារសាលាដែលយើងទទួលបានគឺច្រើន ហើយយើងនឹងមិនបានផ្តោតនូវអ្វីដែលយើងរៀនបានច្បាស់ឡើយ។ លើសពីនេះ យើងក៏គ្មានពេលវេលាសម្រាប់ ខ្លួនឯង ការងារស្ម័គ្រចិត្ត ឬ ការហាត់ការដទៃទៀត ឬ យកពេលទៅរៀនជំនាញអ្វីដែលយើងគិតថានឹងអាចជួយដល់ជំនាញយើងរៀនរាល់ថ្ងៃ។ ឧទាហរណ៍ថា ដូចជារៀនគណនេយ្យមួយមុខ ហើយ រៀនអង់គ្លេសមួយមុខ។ ជំនាញពីរនេះអត់មានអ្វីពាក់ព័ន្ធគ្នាទេ អញ្ចឹងយើងរៀនអ្វីថ្មីដល់ទៅប្រហែល១០មុខក្នុងមួយឆមាស។ ត្រូវចាំថានេះជាមហាវិទ្យាល័យ មិនមែនវិទ្យាល័យ ដែលយើងរៀនភូមិ ប្រវត្តិ គណិតវិទ្យា អី្វដែលយើងរៀន១០មុខហើយ មិនអី។ ព្រោះក្នុង ១០មុខនេះ វាមាន Assignment ការងារផ្ទះ ការងារជាក្រុម បទបង្ហាញ ឬ តម្រូវឲ្យយើងអានសៀវភៅពីផ្ទះមកមុន ប្រលងMid-term ផង Quizផង Final ផង។ បើមិនប្រឹងអញ្ចឹង រៀនមិនបានមធ្យមភាគពិន្ទុ (GPA) ខ្ពស់ ខ្លាចដាក់អាហារូបករណ៍ (scholarship) មិនជាប់។ តែសួរថាបើប្រឹងយ៉ាងហ្នឹង មានពេលអានសៀវភៅ ពង្រឹងចំនេះដឹងយើង ក្រៅពីសៀវភៅនៅសាលាទេ? សួរទៀតថាមានពេល សម្រាប់ស្គាល់គេឯង ឬ ធ្វើការងារស័្មគ្រចិត្តអីអត់? ទោះបីបើមានក៏ហត់ចង់ដាច់ខ្យល់ខ្លួនឯងដែរ? អញ្ចឹងសួរថាធ្វើអញ្ចឹងធ្វើអី្វ? ឃើញគេធ្វើអញ្ចឹងបាន?ហើយសួរថាទៅធ្វើដូចគេធ្វើអី? មនុស្សកើតមក ភាពឆ្លាតវៃខុសៗគ្នា។ រឿងខ្លះគេអាចធ្វើបាន យើងមិនអាចធ្វើបាន រឿងខ្លះយើងអាចធ្វើបាន គេមិនអាចធ្វើបានទេ។ បើគិតថារៀនពីរជំនាញ ព្រោះឃើញគេរៀនពីរជំនាញ ឡូយ។ ឈប់គិតបែបហ្នឹងទៅ! ឡួយហ្នឹង អត់សប្បាយទេ! រៀនមួយជំនាញ ឬ មួយមហាវិទ្យាល័យ ហើយមានពេលមើលថែខ្លួនឯង, ពង្រឹងសមត្ថភាពធ្វើការ តាមរយះ ការធ្វើការស័្មគ្រចិត្ត ឬ ការហាត់ការ, និងស្គាល់គេច្រើន ល្អជាង រៀនពីរ ឬ បីជំនាញ ហើយធ្វើបាបខ្លួនឯងចង់ស្លាប់ទាំងនៅក្មេង ហើយ នៅតែក្នុងសាលា មិនសូវស្គាល់គេឯង ឬសង្គម។ ត្រូវចាំថាចំនេះដឹងនៅសាលាតែមួយមុខមិនអាចឲ្យយើងមានជំនាញគ្រប់គ្រាន់ពេលចូលទៅធ្វើការក្នុង សង្គមទេ។

ការរៀនពីរសាកលវិទ្យាល័យ

បើទោះបីជា ការរៀន ២ មុខជំនាញ នៅថ្នាក់ឧត្តមសិក្សា រឺសាកលវិទ្យាល័យ ហ្នឹងអាចត្រូវបានមើលឃើញថាមាន ការលំបាកមួយចំនួនក្នុងកំឡុងពេលសិក្សា ក៏ដោយ ក៏មានការមើលឃើញថា មានកត្តា និងផលល្អជាច្រើនផងដែរ។ ការរៀននៅថ្នាក់ឧត្តមសិក្សាពិតជាមិនអាចជៀសផុត ពី កិច្ចការងារតាមមុខវិជ្ជានីមួយៗ ទាំងកិច្ចការជាបុគ្គល រឺជាក្រុម នោះឡើយ ។ ការសំខាន់សម្រាប់ការរៀន២មុខជំនាញ គឺ វាអាស្រ័យ ថាតើយើងចេះត្រៀម និង រៀបចំបែបណាទៅលើកិច្ចការងារទាំងនោះ។ បើសិនជាយើងមិនចេះ ត្រៀម មិនយល់ថាការងារណាត្រូវធ្វើមុននោះ ផ្សំនឹងភាពខិ្ជលច្រអូសបន្តិចនោះ ទោះបីជារៀនតែមួយមុខ ក៏នៅតែ ធ្វើការមិនទាន់ រឺកៀកដល់ (deadline) បានធ្វើដដែល។ ផ្ទុយទៅវិញ ភាពលំបាក ឬសំពាធការងារនេះ វាជួយឲ្យយើង ចេះរៀបចំពេលវេលា និងមានភាពឆ្លៀសវៃក្នុងការបត់បែនទៅតាមកាលះទេសះ ។ អ្វីដែលសំខាន់នោះ គឺថានិសិ្សតត្រូវមានភាពវៃឆ្លាតក្នុងការជ្រើសរើសពេលវេលា ឬវេន នៃមុខវិជ្ជាទាំង២ ។ គប្បីរើសពេលវេលាណាដែលផ្តល់ភាពងាយស្រួលដល់ខ្លួន ។ ក្រៅពីការងារនិង មុខវិជ្ជាច្រើន ការរៀនមុខជំនាញ២ ទៀតសោត ក៏បានផ្តល់ឱកាស ជួបនឹងមិត្ត សាស្រ្តាចារ្យ និង មជ្ឈដ្ធានផ្សេងគ្នាជាច្រើន ដែលនេះអាចអោយពួកគាត់បង្កើត បណ្តាញទំនាក់ទំនងច្រើន ផងដែរ។ បើនិយាយពីឱកាស និងការប្រកួតប្រជែងវិញនោះ វារឹតតែមាន ភាពអំណោយផល ដល់អ្នករៀន ២មុខជំនាញ ។ តែអី្វដែលសំខាន់នោះគឺថា យើង មានភាពវៀងវៃ និងចេះ ចង់ចូលរួម ចាប់យកឱកាស ឬការប្រកួតប្រជែងទាំងនោះឬក៏អត់ ។ បើតាមជាក់ស្តែងទៅ នៅក្នុងឱកាសការងារផ្សេង ដូចជាការងារស្ម័គ្រចិត្តជាដើម ឃើញថា និសិ្សត២មុខជំនាញ តែងមាន ភាពសកម្មក្នុងការចូលរួម ជាជាងនិស្សិត ១ មុខជំនាញ ។ អាចនិយាយបានថា និសិ្សតដែល ធ្វើការ និង រៀន ១ជំនាញ ពេលខ្លះ ពួកគាត់ផ្តោតទៅលើការងារជាជាង ដែលពួកគាត់ ពេលខ្លះមិនបានចូលរួមទាំងសកម្មភាពរបស់សាលាខ្លួនផង ។ ដូចដែលបាននិយាយពីខាងលើចឹង និសិ្សត២មុខជំនាញ អាចនឹងមិនខ្ជះខ្ជាយ នូវពេលវេលាដែលគាត់មានបនិ្តចបន្តិច ដ៏មានតម្លៃ នោះឡើយ គឺផ្ទុយទៅវិញ ពួកគាត់ ច្រើនប្រើពេលវេលាទាំងនោះទៅលើអ្វីដែលមាន ប្រយោជន៏ដល់ការសិក្សារបស់គេ ។ 

ចុងក្រោយចង់សរុបមកវិញថា អ្វីដែលគួរធ្វើគឺត្រូវធ្វើការពិភាគសារជាមួយនឹងបា៉ម៉ាក រឺ សិស្សច្បងណាដែលពួក គាត់មានបទពិសោធន៍ ហើយបើតាមយោបល់ផ្ទាល់របស់Admin ប្រសិនបើយើងរៀនតែមួយសាកល វានឹងជួយអោយយើងមានពេលវេលាទំនេរច្រើនដែលយើងអាចរកមើលធ្វើការងារ ការងារស្ម័គ្រចិត្ត រឺការងារផ្សេងៗ ដែលអាចអោយយើងរកប្រាក់ចំនូលបាន និង មានបទពិសោធន៍ការងារស្រាប់។ បើយើងមើលទៅស្រុកគេ គេរៀនតែមួយសាកលទេ ព្រោះវាងាយស្រួលមានលំនឹងការសិក្សា និង ការងារ។ ប៉ុន្តែប្រសិនបើយើងមានបា៉មា៉ក់ គាត់ធានារាប់រង់ការសិក្សាទាំងអស់ហើយ ព្រមទាំងមានពេលទំនេរច្រើនអត់ត្រូវការ ធ្វើការងារអីទេ រៀនពីរសាកលក៏ជួយយើងអោយមានគ្រឹះសិក្សាជំនាញច្រើនដែលអាច ផ្តល់អោយមានឱកាសការងារលើជំនាញផ្សេងៗ។

និយាយជារួមសិក្សាពីរសាកលវិទ្យាល័យ ឬតែមួយសាកលវិទ្យាល័យ សុទ្ធតែល្អដូចគ្នាអោយតែយើងចេះប្រើប្រាស់ពេលវេលាទាំងនោះអោយមានប្រយោជន៍ និងមានគោលដៅច្បាស់លាស់។

ជូនពរសំណាងល្អ!!!

ដោយ៖ Veasna

ប្រភព​៖ WEduShare