ឃាតកម្មសម្លាប់លោកគីម ជុនណាម៖ម៉ាឡេស៊ីពង្រាយកម្លាំងប៉ូលិសព័ទ្ធជុំវិញស្ថានទូតកូរ៉េខាងជើង

នៅក្នុងប្រទេសម៉ាឡេស៊ី សំណុំរឿងឃាតកម្មសម្លាប់លោកគីម ជុនណាមដែលជាបងប្រុសម្តាយទីទៃលោកគីម ជុនអ៊ុនកំពុងបន្តបំពុលទំនាក់ទំនងរវាងទីក្រុងគូឡាឡាំពួ និងទីក្រុងព្យុងយ៉ាង។ បន្ទាប់ពីបានបណ្តេញចេញឯកអគ្គរដ្ឋទូតកូរ៉េខាងជើងនាថ្ងៃចន្ទ ទី៦ មីនាមក នៅថ្ងៃអង្គារ ទី៧ មីនានេះ កម្លាំងប៉ូលិសម៉ាឡេស៊ីបានដាក់ពង្រាយរបាំងសន្តិសុខព័ទ្ធជុំវិញស្ថានទូតកូរ៉េខាងជើងប្រចាំទីក្រុងកូឡាឡាំពួ។ គោលដៅ គឺដើម្បីរង់ចាំចាប់ជនជាតិកូរ៉េខាងជើងចំនួន ៣នាក់ដែលកំពុងលាក់ខ្លួននៅខាងក្នុងស្ថានទូតនោះ។

តាំងពីក្រោយឃាតកម្មសម្លាប់លោកគីម ជុងណាមដែលជាបងប្រុសម្តាយទីទៃរបស់មនុស្សផ្តាច់ការកូរ៉េខាងជើងលោកគីម ជុងអ៊ុននៅព្រលានយន្តហោះក្រុងគូឡាឡាំពួកាលពីថ្ងៃទី១៣ កុម្ភៈមក ទំនាក់ទំនងរវាងម៉ាឡេស៊ី និងកូរ៉េខាងជើងបានឡើងតានតឹងកាន់តែខ្លាំងឡើងៗពីមួយថ្ងៃទៅមួយថ្ងៃ។ បន្ទាប់ពីបានបណ្តេញឯកអគ្គរដ្ឋទូតកូរ៉េខាងជើងនាថ្ងៃចន្ទ ទី៦ មីនាមក រដ្ឋអំណាចបានដាក់ពង្រាយកម្លាំងប៉ូលិស និងរបាំងសន្តិសុខព័ទ្ធជុំវិញស្ថានទូតនៅថ្ងៃអង្គារ ទី៧ មីនានេះដើម្បីរង់ចាំចាប់ជនជាតិកូរ៉េខាងជើងចំនួន ៣នាក់ដែលកំពុងលាក់ខ្លួននៅខាងក្នុងស្ថានទូតនោះ។

មេប៉ូលិសម៉ាឡេស៊ីបានបញ្ជាក់ឲ្យដឹងថា នៅក្នុងដំណើរការស៊ើបអង្កេតស្តីពីឃាតកម្មសម្លាប់លោកគីម ជុងណាម ក្រុមអ្នកស៊ើបអង្កេតត្រូវការសួរចម្លើយលើជនជាតិកូរ៉េខាងជើងទាំង ៣នាក់នាក់នោះឲ្យខានតែបាន។ មេប៉ូលិសរូបនេះដដែលបានបន្ថែមនៅក្នុងសន្និសីទកាសែតថា កម្លាំងប៉ូលិសនឹងរង់ចាំនៅមុខស្ថានទូតកូរ៉េខាងជើងរហូតដល់ជនជាតិកូរ៉េខាងជើងទាំង ៣រូបចេញមកក្រៅ ទោះបីជាត្រូវប្រើពេលរង់ចាំរហូតដល់ ៥ឆ្នាំក៏ដោយ។

គួររម្លឹកជូនឡើងវិញថា ក្រោយឃាតកម្មសម្លាប់លោកគីម ជុងណាម រដ្ឋអំណាចម៉ាឡេស៊ីបានសង្ស័យលើជនជាតិកូរ៉េខាងជើងចំនួន ៨នាក់ ក្នុងនោះ មាន ៤នាក់បានរត់ចេញពីទឹកដីម៉ាឡេស៊ីក្នុងថ្ងៃឃាតកម្ម ម្នាក់ត្រូវបានរដ្ឋអាជ្ញាម៉ាឡេស៊ីដោះលែងនាសប្តាហ៍កន្លងទៅដោយរកមិនឃើញភស្តុតាង និង ៣នាក់នាក់ទៀតកំពុងលាក់ខ្លួនពួនអាត្មានៅខាងក្នុងស្ថានទូតកូរ៉េខាងជើង។

កូរ៉េខាងជើងនៅមិនទាន់មានប្រតិកម្មអ្វីតបនឹងវិធានការថ្មីរបស់ម៉ាឡេស៊ីពេលនេះទេ តែបានចាត់វិធានការតបនឹងការបណ្តេញឯកអគ្គរដ្ឋទូតខ្លួនដោយហាមមិនឲ្យពលរដ្ឋម៉ាឡេស៊ីគ្រប់រូបចាកចេញពីទឹកដីកូរ៉េខាងជើងទេ។ ជាការតបវិញ ម៉ាឡេស៊ីក៏បានប្រកាសចាត់វិធានការភ្លាមៗដូចគ្នានេះ៕

ប្រភព៖ km.rfi.fr