យោងតាម YONHAP ថា អតីតអ្នកការទូតជាន់ខ្ពស់កូរ៉េខាងជើងប្រចាំក្រុងឡុងដ៍ ហើយរត់ចោលជួរកាលពីឆ្នាំទៅមិញ មកកាន់កូរ៉េខាងត្បូង លោក THAE YONG -HO បានធ្វើការវិភាគពីការធ្វើឃាតលោកគីម ជុងណាម នៅម៉ាឡេស៊ី ដោយលោកនិយាយថា លោកគីម ជុងអ៊ុន នៅពីក្រោយការធ្វើឃាតនោះហើយយុវជនគីម ហានសូល កូនប្រុសលោកគីម ជុងណាម ក៏ជាគោលដៅនៃការសម្លាប់ចោលដែរ ។
ក្នុងសន្និសីទសារព័ត៌មានមួយមុខបណ្តាអ្នកកាសែតជប៉ុននៅក្រុងសេអ៊ូល លោក THAE គូសបញ្ជាក់ថា ឆន្ទៈរបស់លោកគីម ជុងអ៊ុន ពង្រីកអំណាចកំពូលរបស់ខ្លួនលាក់ពីក្រោយការធ្វើឃាតលោកគីម ជុងណាម ព្រោះតែបងប្រុសម្តាយទីទៃរូបនេះមានឥទ្ធិពលខ្លាំងក្នុងសង្គមកូរ៉េខាងជើង ហើយបងប្រុសរូបនេះជាឧបសគ្គធំទីមួយសម្រាប់ថែរក្សារបបរបស់លោកឱ្យបានយូរអង្វែង ។
លោក THAE បន្តថា ដោយសារការទុកលោកគីម ជុងណាម អាចជះឥទ្ធិពលដល់ក្នុងផ្ទៃសង្គមកូរ៉េខាងជើងជាមួយការបន្តធ្វើបទសម្ភាសន៍នានាជាមួយបណ្តាសារព័ត៌មានលោកខាងលិច បែបនេះអាចអំពល់ទុក្ខដល់លោកគីមជុងអ៊ុន ។ លោកសន្និដ្ឋានថា ការធ្វើឃាតលោកគីមជុងណាម គឺតាមបញ្ជារបស់លោកគីម ជុងអ៊ុន ។
ទាក់ទិននឹងយុវជនគីមហានសូល កូនប្រុសលោកគីម ជុងណាម អតីតអ្នកការទូតជាន់ខ្ពស់កូរ៉េខាងជើងរូបនោះវិភាគថា សម្រាប់លោកគីមជុងអ៊ុន យុវជននេះដាច់ខាតត្រូវកម្ចាត់ចោល។ គេពុំដឹងថាតើរូបគេរស់នៅបានយូរប៉ុណ្ណាឡើយ។
ចំពោះសារធាតុបំពុលលោក THAE គូសបញ្ជាក់ថា កូរ៉េខាងជើងបានបង្កើតបណ្តាអាវុធជីវសាស្ត្រ ចាប់តាំងពីទសវត្សឆ្នាំ១៩៦០មកម្ល៉េះ ។ នៅកូរ៉េខាងជើងគ្រួសារនីមួយៗមានឧបករណ៍ការពារប្រឆាំងការវាយប្រហារដោយអាវុធជីវៈគីមី និងមានថ្នាំប្រឆាំងការពុល ។
យុវជនម្នាក់មុខដូចគីមហានសូល គេឃើញបង្ហាញខ្លួនតាមវីដេអូឃ្លីបមួយលើ YOUTUB ហើយចេញផ្សាយកាលពីថ្ងៃទី៨ មីនា ។ ក្នុងវីដេអូយុវជនរូបនោះនិយាយថា គេឈ្មោះគីម ហានសូល និងថាឪពុករបស់គេត្រូវធ្វើឃាតកាលពីប៉ុន្មានថ្ងៃមុននេះ
