នៅព្រឹកថ្ងៃទី១ ខែមីនា ឆ្នាំ ២០១៧ ជ័យលាភីបវរកញ្ញាពិភពលោក ២០១៦ និងបវរកញ្ញាខ្មែរអាមេរិកង បានចូលរួមសកម្មភាពអប់រំបរិស្ថាន នៅតាមបណ្តោយឆ្នេរឯករាជ្យ ខេត្តព្រះសីហនុ ដោយមានការចូលរមពីក្រសួងបរិស្ថាន អាជ្ញាធរខេត្តព្រះសីហនុ មន្ទីរបរិស្ថានខេត្តព្រះសីហនុ មន្ទីរទេសចរណ៍ សហភាពសហព័ន្ធយុវជនកម្ពុជា ខេត្តព្រះសីហនុ និងសាធារណជនសរុបប្រមាណជាង១០០នាក់។
លោក អ៊ាង សុផល្លែត អនុរដ្ឋលេខាធិការក្រសួងបរិស្ថាន បានថ្លែងថា ការអប់រំផ្សព្វផ្សាយនេះ ធ្វើឡើងដើម្បីបំផុសចលនាចូលរួមពីមហាជនទូទៅក្នុងកិច្ចគាំពារបរិស្ថាន ចូលរួមក្នុងការថែរក្សាបរិស្ថានតំបន់ឆ្នេរសមុទ្រ ដែលជាតំបន់ទេសចរណ៍ ធម្មជាតិដ៏ស្រស់ស្អាតសម្រាប់ភ្ញៀវទេសចរណ៍ជាតិ និងអន្តរជាតិទៅលេងកំសាន្ត។
តាមរយៈកម្មវិធីនេះ ក៏មានការបង្ហាញពីប្រតិភូបវរកញ្ញាពិភពលោកនូវសារៈ ប្រយោជន៍នៃធនធានសមុទ្រ និងតំបន់ឆ្នេរសមុទ្រកម្ពុជា ដែលជួយទ្រទ្រង់ដល់វិស័យអេកូទេសចរណ៍ ការថែរក្សាជីវចម្រុះ និងការលើកកម្ពស់ជីវភាពរបស់ប្រជាលរដ្ឋ។ ជាមួយគ្នានេះដែរ ប្រតិភូបវរកញ្ញាពិភពលោក ក៏បានផ្តល់សារអប់រំបរិស្ថានមួយចំនួនជាភាសាខ្មែរដល់សិស្ស និស្សិត និងប្រជាពលរដ្ឋតាមរយៈកម្មវិធីនេះទៅដល់អ្មកផ្តល់សេវាកម្មទេសចរណ៍ និងភ្ញៀវទេសចរណ៍ផងដែរ ដើម្បីឆ្លើយតបទៅនឹងប្រធានបទ «សប្បុរសធម៌ដើម្បីបរិស្ថាន និងទេសចរណ៍នៅកម្ពុជា»៕
ដោយ៖NSN
